വായനാവാരം - 2018

കൂട്ടുകൂടാം പുസ്തകച്ചങ്ങാതിമാർക്കൊപ്പം

ഇരുമ്പുഴി ഗവ: ഹയർ സെക്കണ്ടറി സ്കൂളിൽ 2018-19 അധ്യയന വർഷത്തിലെ വായനാ വാരം പ്രവർത്തനങ്ങൾക്ക്  ഗംഭീരമായ തുടക്കം...ജൂൺ 19 ചൊവ്വാഴ്ച സ്കൂൾ അസംബ്ലിയിൽ ഹെഡ്മിസ്ട്രസ് ഗിരിജ ടീച്ചർ വായനാവാരം പ്രവർത്തനങ്ങൾ ഉദ്ഘാടനം ചെയ്തു. മനുഷ്യജീവിതത്തിൽ വായന എത്രത്തോളം പ്രാധാന്യമർഹിക്കുന്നുവെന്ന് ടീച്ചർ കുട്ടികളെ ബോധ്യപ്പെടുത്തി. സ്കൂൾ ലൈബ്രറി ചുമതലയുള്ള മധു മാഷ് വായനാ വാരം പ്രവർത്തന രേഖ അവതരിപ്പിച്ചു.  കവിയും പത്താംതരം വിദ്യാർത്ഥിനിയുമായ നജ് വ  അവതരിപ്പിച്ച സച്ചിദാനന്ദൻ കവിതകളുടെ ആസ്വാദനം ഏറെ ഹൃദ്യമായി .

ലൈബ്രറി കാർഡുമായി വരൂ ലൈബ്രറിയിലേക്ക് 

കേവലം ഒരാഴ്ചയിൽ മാത്രമൊതുങ്ങാതെ ഒരു വർഷം മുഴുവൻ നീണ്ടു നിൽക്കുന്ന പ്രവർത്തനങ്ങളാണ് ഇക്കുറി ആസൂത്രണം ചെയ്തിട്ടുള്ളത്. ഇതിന്റെ ഭാഗമായി ഓരോ കുട്ടിയും ഈ വർഷം ചുരുങ്ങിയത് നൂറു പുസ്തകമെങ്കിലും വായിച്ചിരിക്കണം എന്ന് തീരുമാനമെടുത്തു. നാട്ടിലുള്ള ലൈബ്രറികളിൽ പോയി പുസ്തകമെടുത്തു വായിക്കാൻ പല കുട്ടികൾക്കും സാധിച്ചിട്ടില്ല. അതു കൊണ്ടു തന്നെ സ്കൂൾലൈബ്രറി ശാക്തീകരണത്തിലൂടെ മാത്രമേ ഇത് നടപ്പിലാക്കാനാവൂ .. ഇതിനായി എല്ലാ കുട്ടികൾക്കും ഫോട്ടോ പതിച്ച ലൈബ്രറി കാർഡ് നൽകാൻ തീരുമാനിച്ചു. കാർഡിന്റെ വിതരണോദ്ഘാടനവും വായനാദിന അസംബ്ലിയിൽ നടന്നു.8, 9, 10 ക്ലാസ്സ് പ്രതിനിധികൾക്ക് ഹെഡ്മിസ്ട്രസ്സിൽ നിന്ന് കാർഡ് ഏറ്റുവാങ്ങി. 

വായിച്ച പുസ്തകങ്ങളുടെ പേര് ക്രമമായി രേഖപ്പെടുത്താൻ കഴിയുന്ന രീതിയിലാണ് കാർഡ് രൂപകല്പന ചെയ്തത്.   8, 9, 10 ക്ലാസ്സുകാർക്ക് യഥാക്രമം നീല, റോസ്, മഞ്ഞ നിറങ്ങളിലുള്ള കാർഡ് നൽകിയത് പുസ്തക വിതരണത്തിന് ഏറെ സഹായകമായി മാറി. 

       
വളരണം ഒരു വായനാ സംസ്ക്കാരം

കുട്ടികളിൽ വായനാ സംസ്കാരം വളർത്തുന്നതിനു വേണ്ടി എല്ലാ ക്ലാസ്സുകാർക്കും ഒരു ലൈബ്രറി പിരിയഡ് മാറ്റി വച്ചത് ഏറെ ഫലം ചെയ്യുന്നുണ്ട്. ലൈബ്രറിയിൽ പോയി പുസ്തകമെടുക്കുകയും ലൈബ്രറിയിലിരുന്ന് നിശ്ശബ്ദമായി വായിക്കുകയും ചെയ്യുന്ന രീതിയിൽ ഒരു വായനാ സംസ്കാരം കുട്ടികളിൽ വളർന്നു വരാൻ തുടങ്ങിയിട്ടുണ്ട് .. ഈ വർഷം അവസാനമാകുമ്പോഴേക്കും നല്ല വായനാ സംസ്ക്കാരമുള്ളവരായി ഞങ്ങളുടെ കുട്ടികൾ മാറുമെന്ന് ഞങ്ങൾക്കുറപ്പുണ്ട്.

         
മുപ്പത് ദിവസം - മുപ്പത് കഥ

മലയാളത്തിലെ പ്രശസ്തരായ എഴുത്തുകാരുടെ ശ്രദ്ധേയമായ കഥകൾ കുട്ടികളിലേക്കെത്തിക്കുന്നതിനു വേണ്ടി ആരംഭിച്ച  പദ്ധതിയിയാണ്   "മുപ്പത് ദിവസം - മുപ്പത് കഥ". സ്കൂൾ റേഡിയോ -വിദ്യാ വാണി -യിലൂടെ എന്നും ഉച്ചയ്ക്ക് 1.30 മുതൽ രണ്ടു മണി വരെയുള്ള സമയത്താണ് ഇത് പ്രക്ഷേപണം ചെയ്യുന്നത്. പാഠപുസ്തകങ്ങളിൽ പരിചയപ്പെട്ട എഴുത്തുകാരുടെ കൂടുതൽ രചനകൾ പരിചയപ്പെടുന്നതിനും വായനയിൽ താല്പര്യം വളർത്തുന്നതിനും ഈ പരിപാടി സഹായകമാവുന്നു. 

      

സാഹിത്യ ക്വിസ് -ഡിജിറ്റൽ വേഷത്തിൽ

വായനാവാരത്തോടനുബന്ധിച്ച് നടത്തിയ സാഹിത്യ ക്വിസ്  ഏറെ പുതുമയാർന്നതായി. സിജിറ്റൽ സംവിധാനങ്ങളുപയോഗിച്ച് നടത്തിയ ഡിജിറ്റൽ ക്വിസ് കുട്ടികൾക്ക് പുതിയൊരനുഭവമായി മാറി. 8 സി ക്ലാസ്സിലെ മുഹമ്മദ് അൻസിഫ് ഒന്നാം സ്ഥാനവും 8 ബിയിലെ സന ഫാത്തിമ, 9 A യിലെ സ്മിയുഷ്ണ എന്നിവർ രണ്ടും മൂന്നും സ്ഥാനങ്ങളും കരസ്ഥമാക്കി.

സ്കൂളിലെ ക്ലാസ്സ് മുറികളെല്ലാം സ്മാർട്ട് ക്ലാസ്സുകളായതോടെ, അനുബന്ധ പരിപാടികൾ പോലും ഡിജിറ്റൽ സംവിധാനങ്ങളുപയോഗിച്ച് നടത്താനാവുന്നു എന്നത് ഏറെ അഭിമാനകരമാണ്. ബഷീർ ദിനത്തിൽ ക്ലാസ്സ് തല ക്വിസ് മത്സരവും തുടർന്ന് സ്കൂൾ തല ക്വിസ് മത്സരവും ഇത്തരത്തിൽ നടത്തിയതും ഹൃദ്യമായ അനുഭവമായിരുന്നു. വ്യത്യസ്ത റൗണ്ടുകളായി നടന്ന ക്വിസ് മത്സരം ബഷീർ കഥാപാത്രങ്ങളെക്കുറിച്ചും  കൃതികളെക്കുറിച്ചും ആഴത്തിലുള്ള അവബോധമുണ്ടാക്കാൻ കുട്ടികളെ പ്രേരിപ്പിക്കുന്നതും സഹായിക്കുന്നതുമായി മാറി.  ആഴ്ച തോറും നടത്തുന്ന പുസ്തക ചർച്ച കുട്ടികൾക്ക് ഏറെ ഗുണകരമാണ്.

          

ക്ലാസ്സ് വായനകൾ

സ്കൂൾ തല പ്രവർത്തനങ്ങൾക്കു പുറമേ ക്ലാസ്സ് തല പ്രവർത്തനങ്ങളും നടന്നു വരുന്നു. ക്ലാസ്സ് ലൈബ്രറികൾ സജീവമായി പ്രവർത്തിക്കുന്നു. കഥ -കവിത -പുസ്തകാസ്വാദനങ്ങൾ  ദിവസവും നടക്കുന്നു. കുട്ടികൾ ലൈബ്രറി നോട്ടുകൾ തയ്യാറാക്കി വരുന്നു.
        

ഭാവി

ഈ ഇന്റർനെറ്റ് യുഗത്തിൽ ഏറെയേറെ കൗതുകങ്ങൾ കുട്ടികളെ കാത്തിരിക്കുന്നുണ്ട്. അതിനിടയിലും, പുസ്തകങ്ങളാണ് ഏറ്റവും നല്ല കൂട്ടുകാർ എന്ന് കുട്ടികളെ ബോധ്യപ്പെടുത്തി അവരെ നല്ല വായനക്കാരാക്കി മാറ്റുക എന്നതാണ് ഞങ്ങൾ ഏറ്റെടുത്ത ലക്ഷ്യം.. ഒന്നോ രണ്ടോ മാസങ്ങൾ കൊണ്ട് ഫലം കാണാനാവില്ല എന്നറിയാം. നിരന്തര പ്രയത്നത്തിലൂടെ മാത്രമേ ഇത് സാധിക്കൂ.. അതു കൊണ്ട് തന്നെയാണ് വർഷം മുഴുവൻ നീണ്ടു നിൽക്കുന്ന പ്രവർത്തനങ്ങൾ ആസൂത്രണം ചെയ്യാൻ ഞങ്ങൾ ശ്രമിച്ചിട്ടുള്ളത്.